Veðurvaktin ehf

Í skipulagi byggðar hér á landi skiptir miklu að byggðin sjálf myndi skjól í algengustu vindáttunum og að einstakar byggingar séu hannaðar og staðsettar þannig að vindstrengir nái sér síður á strik. Vindur eykst alla jafna með hæð og hærri byggingar geta hæglega dregið aukna veðurhæð niður á lóð umhverfis bygginguna. Samsetning og gerð hærri bygginga, innbyrðis staða og bilið á milli þeirra eru allt þætti sem áhrif hafa á vindskilyrði. Við mat á hagkvæmni skipulags m.t.t. skjólmyndunar verður að líta til helstu óveðursvindátta á vetrum, stöðguleika vindsins og ekki síður hvernig hönnun bygginga og umhverfis (landslags) er til þess fallin að bæta skilyrði til útiveru að sumarlagi. Mikil áhersla er lögð á áreiðanleika vindgagna og öflun nýrra vindmælinga þar sem þeirra er þörf. Nærviðri (microclimate) er snar þáttur í lífssgæðum fólks í borgum og bæjum. Landslagið næst okkur ásamt byggðinni móta nærviðrið og ekki má þá gleyma vaxandi trjágróðrinum. Mótun byggðar hefur áhrif á hitadreifingu, vind og vindsveipi, skuggavarp sólar, skafrenning og snjósöfnun svo nokkuð sé nefnt. Veðurvaktin ehf er í samstarfi við verkfræðistofuna Orion sem hefur yfir vindhermi að ráða til hjálpar við vindgreininguna. Einnig er unnið náið með þeim hönnuðum mannvirkja sem við eiga hverju sinni.

Einar Sveinbjörnsson eigandi Veðurvaktarinnar hefur mikla reynslu af kennslu og fyrirlestrahaldi um hvað eina það sem við kemur veðri. Hann hefur sinnt stundakennslu í HÍ og HR, haldið námskeið með leiðsögumönnum og fjallaveður hjá björgunarsveitum, jeppa- og vélsleðamönnum o.fl. Veðurvaktin vinnur nú að fræðsluefni ætlað þeim sem koma að vetrarþjónustu fyrir Vegagerðina.



Þá hefur Einar haldið úti veðursíðu á bloggsvæði mbl.is frá því í apríl árið 2006 og er þar að finna fróðleikssíður um veður og veðurfar innanlands og utan að jafnaði 5 sinnum í viku hverri. Einar fjallar um veður og veðurspár í helgarblaði DV og í morgunútvarpi Rásar 2 á hverjum fimmtudagsmorgni laust fyrir kl. hálf átta.