Þær gengu sérlega vel kvikmyndatökurnar á Langjökli nú í nóvember á vegum Saga Film.
Verið var að taka upp atriði í þýska sjónvarspmynd um kapphlaup Roald Amundsen og Robert Scott
á Suðurskautslandið árið 1911. Veðurvaktin annaðist veðurþjónustu og ekki ónýtt að fá ummæli
eins og þessi: " Þá hafði tökuliðið greiðan aðgang að Einari Sveinbjörnssyni veðurfræðingi,
sem kom þýskum kvikmyndagerðarmönnum stöðugt í opna skjöldu með ótrúlegri nákvæmni í veðurspám...
Hann sá m.a. fyrir hvenær stormur upp á 25 m/s myndi ganga niður upp á mínútu." Langjökull
er vinsæll í kvikmynda- og auglýsingagerð, það er auðvelt að komast að jöklinum að vestanverðu
og þar er oft ágætis veður, þó svo að óvíða verði jafn hvasst á landinu og einmitt á jöklinum
þar sem tökur fóru fram í vissri gerð SA-áttar. (Úrklippa úr Fréttablaðinu 23. nóv 2010)
Föstudaginn 5. nóvember var kynnt staða rannsóknarverkefnis Veðurvaktarinnar á árlegri
rannsóknaráðstefnu Vegagerðarinnar. Frá 2008 hefur verið unnið að verkefni sem kallast
"Ferðaveðurspá, vindhviður og aðrir veðurþættir sem áhrif hafa á umferð". Unnið hefur
verið kort af þeim fjölförnum stöðum við vegi landsins þar sem vindhviður þykja skeinuhættar.
Verið er að þróa töluleg líkön fyrir helstu staðina þar sem hviðuveður eru tengt vindátt,
vindstyrk og hitafallanda í hæð. Í fyrirlestri á ráðstefnunni voru kynntar tilraunaspár
sem nú eru komnar í gagnið fyrir Kjalarnes og Hafnarfjall. Á næstunni verður bætt við
Hraunsmúla í Staðarsveit, Kolgrafarfjarðarbrú, Steinum undir Eyjafjöllum og Sandfelli og
Kvískerjum í Öræfasveit. Vegagerðin stefnir að birtingu þessara spáa á vef sínum að
lokinni þróun þeirra
Samið hefur verið við Veðurvaktina um veðurspá sem birtist í vikublaðinu Fréttatímanum. Um er að ræða þrjú spákort fyrir helgina (föstudagur- sunnudagur) ásamt yfirlitstexta. Fréttatíminn kemur út á föstudögum og er dreift í öll hús á Höfuðborgarsvæðinu.
Samið hefur verið við vefmiðilinn mbl.is um veðurspár í allt sumar. Veðurvaktin sendir ítarlegar
horfur á fimmtudagsmorgni til birtingar á mbl.is. Reynt verður að horfa sérstaklega til þarfa
ferðafólks og þeirra sem njóta vilja útiveru í frítíma sínum í sumar.
Veðurvaktin og Landsnet eiga í samstarfi. Á meðan á eldgosinu í Eyjafjallajökli stóð var
fylgst með gjóskudreifingu, en gjóskufall á spennivirki og annan raforkubúnað getur valdið
rekstrartruflunum. Eins eru eldingar skeinuhættar, en í Eyjafjallajökulsgosinu urðu þær
einkum næst eldstöðinni, nokkuð sem ekki er raunin í Kötlugosum þegar meiri vatnsgufa frá
bráðnandi ís er á ferðinni. Allt fór vel að þessu sinni og engar rekstrartruflanir urðu
á dreifikerfi Landsnets á meðan á gosinu stóð. Áfram er fylgst með gjóskufjúki, en gripið
er til þess ráðs að skola tengivirki og hreins þau s.s. á Hvolsvelli og víðar til að koma í
veg fyrir hættu á skammhlaupi um einangrara.
Hjá Námsgagnastofnun er komið út námsefni um loftslagsbreytingar sem hugsað er fyrir
unglingastig grunnskóla. Einar Sveinbjörnsson er höfundur efnis, en teikningar og
umbrot var í höndum PORT-hönnunar. Þemaheftið CO2 fjallar frá ýmsum sjónarhornum um
loftslagsbreytingarnar á jörðinni og er reynt að varpa ljósi á flókin ferli sem eiga
sér stað í náttúrunni. Leitast er við að svara áleitnum spurningum en jafnframt að
vekja áhuga nemenda á nýjum viðfangsefnum og opna möguleika á áframhaldandi
þekkingarleit í tengslum við umhverfismál. Þemaheftið CO2 er hluti námsefnis um
loftslagsbreytingar sem efnt var til í samvinnu Námsgagnastofnunar og
umhverfisráðuneytisins og er heftið hugsað fyrir unglingastig.
Einar Sveinbjörnsson mætti á fræðslufund hjá Hjálparsveit Skáta í Kópavogi
þann 9. mars. Félagar í sveitinni fjölmenntu og var viðfagnsefnið veðurfræði
til fjalla og eins það sem huga þarf að við öflun veðurupplýsinga og ekki
síst hvaða spár koma að bestu gagni. Eins og undanfarna vetur hefur verið
annasamt við kennslu og fyrirlestrahald af hálfu Veðurvaktarinnar.
Á dögunum var m.a. Landbúnaðarháskólinn á Hvanneyri heimsóttur og “messað”
yfir nemendum á umhverfis- og náttúrufræðibraut um loftslagsbreytingar.
Nú styttist í útgáfu námsbókar í loftslagsmálum og veðurfarsbreytingar af manna völdum sem
Einar Sveinbjörnsson er höfundur að. Námsgangastofnum leitaði til Veðurvaktarinnar í vor um gerð
námsefnis um þessi mál sem ætluð væri elstu bekkjum grunnskólans. Útlitshönuðir hjá Porthönnun þau
Edda V. Siguðrardóttir og Kári Marteinsson sjá um allt myndefni og uppsetningu efnis. Þá hefur
Námsgangastofnun lagt nokkurn metnað í þýðingu og staðfæringu fræðslumyndar sem ætlað er að styðja
við námsbókina. Í dag 11. nóvember, á sérstökum norrænum loftslagsdegi, var opnuð með ráherraviðhöfn
heimasíða sem ætlað er að kynna efni bókarinnar og myndarinnar. Slóð hennar er hér:
http://www.nams.is/co2
á milli Dýrafjarðar og Arnarfjarðar. Munu þau leysa af hólmi farartálmann Hrafnseyrarheiði,
en á myndinni úr safni Vegagerðarinnar gefur að líta gríðarleg snjóalög á heiðinni í apríl
árið 2000. Veðurvaktin tók að sér að gera lýsingu á veðuraðstæðum við fyrirhugaða gangnamunna,
einkum vindafari. Ekki eru fánalegar mælingar nærri botni Arnarfjarðar né heldur Dýrafjarðaar,
en ágætar mælingar er að hafa ofan af fjöllunum. Með samtölum við staðkunnuga reyndist unnt að
gefa sæmlega heillega mynd helstu vindum jafnt sumar sem vetur. Talsverðar vangaveltur voru
einnig um loftun ganganna og þátt vindsins í henni. Fyrir áhugasama er hér tengill á matsskýrslu
http://www.vegagerdin.is/framkvaemdir-og-vidhald/umhverfismat/frummatsskyrsla/nr/2180
Seglskúta á leið austur yfir Atlantshafið frá Nova Scotia hefur notið leiðsagnar Veðurvaktarinnar
nú í september. Leiðbeingingar um siglingastefnu út frá vindafari og öldu er oft kölluð veðurrútun.
Oftast leita útgerðir stærri skipa eftir leiðbeiningum um siglingastefnu, til að spara tíma og fjármuni.
Hægt er með hugkvæmni að sneiða hjá óhagstæðum vindi og öldum sem fylgja lægðum eða öðrum veðurkerfum sem
eru á hreyfingu. Veðurrútun smærri skipa er ekki eins algeng, Fyrir seglskútur er ígrunduð ráðgjöf ekki
síður mikilvæg, sérstaklega fyrir öryggi skips og áhafnar. Í þessu tilviki stóð valið snemma um hvort
stefna skyldi á Azoreyjar eða S-England. Á siglingu eins og þessari þarf að sneiða hjá, ef nokkur er
kostur, fram hjá djúpum haustlægðum og eins að skútan fái sem hagstæðastan byr í seglin. Þá skiptir
vindáttin vitanlega miklu máli.
Copyright Eddie Soloway. All Rights Reserved.
Íslenska fyrirtækið Focus on Nature hefur í sumar skipulagt þrjár vikulangar ljósmyndasmiðjur undir handarjaðri heimsþekktra ljósmyndara þar sem farið er á áhugaverða staði og umhverfið og birtan fönguð. Sú síðasta stóð yfir í endaðan ágúst þar sem bandaríski ljósmyndarinn Eddy Soloway fór með lítinn hóp erlendra atvinnu- og áhugaljósmyndara um landið. Miklu skiptir að fá heppilegt veður og góða birtu, ekki endilega heiðbláan himinn, heldur þykja skilyrði þegar sól veður í skýjum eftirsóknarverðari. Þá má ekki rigna að ráði og heldur ekki vera of hvasst fyrir þrífætur og annan búnað. Veðurvaktin kom daglega að aðstoð við val á stöðum og þrátt fyrir rysjótt veður á landinu dagana 23. til 29. ágúst tókst ljósmyndasmiðjan vel.
Afrakstur rannsóknar Veðurvaktarinnar á ísafari Þingvallavatns liggur fyrir í grein í nýju hefti
Náttúrfræðingsins. Í venjulegu árferði leggur Þingvallavatn snemma í janúar og ís helst á vatninu
í nokkrar vikur, stundum fram í apríl. Fá dæmi eru um íslausa vetur á Þingvallavatni, en þó er vitað
um tvö tilvik á þriðja áratug síðustu aldar. Frá síðustu aldamótum hefur það síðan gerst í tvígang að
vatnið hefur alls ekki lagt og þriðja veturinn stóð ísinn við í aðeins nokkra daga. Ísleysi sem og
seinkun ísmyndunar síðustu árin frá því sem áður var verður að einhverju leyti rakið til hlýnandi
veðráttu síðasta áratuginn eða svo.
Háu blokkirnar við Blásali í Kópavogi hafa þau áhrif að magna upp vind á milli þeirra.
Vindmögnun við háhýsi er alþekkt fyrirbæri. Í vondum SA-stormum veturinn 2007-2008 skapaðist
hætta við inngang hússins nr. 22 og hlutust af óhöpp þegar íbúar og gestir hreinlega tókust á
loft. Við þessi vindskilyrði sogast loftið niður með austurhlið hússins og skrúfast fyrir
hornið þar sem ingangurinn er af miklum krafti. Nú hafa verið setti upp þrír vindbrjótar úr
timbri fast upp við austurhliðina og er ætlunin að þeir geti dregið úr mestu hnútunum þegar
hressilega blæs af SA. Um er að ræða timburkassa og í þeim hefur verið komið fyrir hraðvaxta
víði. Háhýsin er ekki vel hönnuð m.t.t. vindmögnunar og eru vindbrjótarnir tilraun til að auka
öryggi fólks við inngang nr. 22 í hvassri SA og A-átt.
Veðurvaktin tekur þátt í rannsóknarverkefni ásamt Háskólanum í Reykjavík, Verkfræðistofunni Eflu
og Veðurstofunni sem felst í því að kanna möguleg áhrif jarðgufu frá Hellisheiðarvirkjun á
hálkumyndun á Suðurlandvegi, einkum í Hveradalabrekkunni. Nokkur umræða var um það í vetur að
hugsanlega ætti jarðgufa þátt í myndun ísingar á Suðurlandsvegi. Í verkefninu verður m.a. gerð
slysagreining fyrir umræddan kafla og skoðað hvort og hvernig gufan breytir rakainnihaldi loftsins
við tiltekin veðurskilyrði. Þá er ætlunin að framkvæma beinar hálkumælingar næsta vetur við þessi
sömu skilyrði. Orkuveita Reykjavíkur og Vegagerðin leggja til styrktarfé úr sínum rannsóknarsjóðum
til verkefnisins.
Grandi hf hefur í hyggju að endurnýja fiskimjölsverkmiðju sína á Vopnafirði.
Vélsmiðjan Héðinn og ASK arkitektar fengu Veðurvaktina til að skoða áhrif nálægra
fiskimjölssílóa á niðurdrátt bræðslureyks úr yfir 30 metrar háum skorsteini.
Mjölsílóin eru fyrirhuguð og nauðsynlegt að meta saman áhrif sílóanna og verksmiðjunnar
strax á skipulagsstigi, ekki síst ef mið er af því tekið að mannvirkin eru svo að segja
í miðju þorpinu. Helsta niðurstaðan var sú að sé haft bil á milli silóanna virka þau
frekar sem stór “skjólveggur” og niðurdráttur lofts með tilheyrandi vindsveipum verður
verulega minni fyrir vikið.
Líkt og í fyrravetur er nú hafin dagleg veðurþjónusta Veðurvaktinnar fyrir Vegagerðina.
Fylgst er náið með veðri og einkum horfum á hálku, ófærð eða öðru því sem leiðir getur til
erfiðra akstursskilyrða að vetrarlagi. Daglega eru sendar spár sem notaðar eru af starfsfólki
þjónustudeild Vegagerðarinnar um land allt og einnig þeim þjónustuverktökum sem annast mokstur
og hálkuvarnir. Að auki er varað við hvenær sem tilefni er til og sýnt þykir að veður sé að
þróast á verri veg en áður mátti ætla. Ávinningur þjónustuaðila Vegagerðarinnar er sá að með
ýtarlegri skoðun og túlkun á veðuspám og útliti næstu klukkustundirnar megi bæði koma í veg
fyrir of mikinn viðbúnað þegar ekki er ástæða til og ekki síður að sjá greina betur veður og
skilyrði sem sanarlega leiða til erfiðra og jafnvel hættulegra akstursskilyrða svo bregðast
megi við í tíma eða vara sérstaklega við.
Landsnet hyggur á byggingu nokkurra nýrra tengivirkja í flutningskerfi sínu.
Ýmist er um að ræða stækkun núverandi tengivirkja eða byggingu nýrra.
Veðurvaktin skoðaði vindafar, aðstæðum til snjósöfnun, seltuáraun og þátt brennisteinsvetnis
í lofti þar sem það á við nærri orkuvinnslu jarðhita s.s. í Bjarnarflagi við Mývatn.
Í Háskólanum í Reykjavík hefur hópur viðskipta-, hagfræði- og verkfræðinemar sótt í haust
námskeiði um orkumál, umhverfi og viðskipti. Auðlindahagfræði er fyrirferðarmikil, en áhersla er
einnig mikið á loftlagsmál og afleiðingar loftslagsbreytinga. Veðurvaktin annast kennslu þessara þátta
og auk fyrirlestra að þá lögðu Einar Sveinbjörnsson og Kristján Vigfússyni aðjúnkt og umjónarmaður
námskeiðisins fyrir nemendur áhugaverð verkefni. M.a. það að rýna frá ýmsum hliðum athyglisverðar bækur
um loftslagsbreytingar og aðgerðir til að koma í veg fyrir hlýnun af mannavöldum.
Kynningu á nýjum VW Golf Bláfjöllum stóð yfir í þrjár vikur og er nú lokið.
Veðurvaktin annaðist daglega veðurspáþjónustu vegna þessa verkefnis og sérstaklega
þurfti að huga að hvössum vindi og sterkum hviðum staðbundið vegna bráðabirgðahússins
sem reist var í Eldborgargili við Framskálann. Segja má að Þjóðverjarnir sem stóðu
fyrir herlegheitunum hafi hreppt eins leiðinlegt haustveður og hægt er að hugsa sér,
lægðagang eins og hann gerist hvað verstur á þessum árstíma og rigningarsamt var með
afbrigðum nánast allan tímann. Úrkomumagnið í Bláfjöllum þessar þrjár vikur var um 750 mm
sem slagar upp í ársúrkomu í Reykjavík ! En allt gekk vel og kynningin á bílnum gekk þrátt
fyrir allt mjög vel og rúðuþurkurnar á hinum nýja Golf munu ekki lenda í annarri eins þolraun !
Í sumar hefur Veðurvaktin gert sérstakar veðurspár hvern fimtudag sem ætlaðaðar eru veiðimönnum.
Spánar eru birtar á vef mbl.is. Auk þess að spá í veiðiveður komandi helgar er rýnt sérstaklega
í úrkomuhorfur og fjallað um vatnafar og rennsli í veiðiám. Gerð er tilraun til að horfa rúma viku
fram í tímann og með hliðsjón af þörfum þeirra sem ánægju og yndi hafa af stangveiðum, og skiptir þá
engu hvort um er að ræða lax- eða silungsveiðar. Veiðiveðrið hefur notið talsverðra vinsælda og verður
það á sínum stað eitthvað fram á haustið í samvinnu við netútgáfu Morgunblaðsins. Slóðin er http://mbl.is/mm/frettir/vedur/veidi/.
Um þessar mundir standa yfir tökur á bíomyndinni R.W.W.M. Myndin greinir frá
hvalaskoðunarskipi sem lætur úr höfn í Reykjavík, en ekki vill betur en svo að
skipið ferst. Hvalaskoðunarfólkinu er bjargað í nærstaddan hvalveiðibát.
Ýmislegt fer síðan úrskeiðis í samskiptum hvalveiðara og -hvalaskoðara.
Eins og gefur að skilja er verulegur hluti myndarinnar tekinn á sjó.
Nú í ágúst hefur Veðurvaktin séð um daglegar veðurspár þar sem bæði þarf
að velta vöngum yfir vindinum og ekki síður sjógangi. Í veltingi getur
verið erfitt að hemja tökubúnað og leikurum og starfsliði er jafnframt
hætt við velgju ef ekki sjóveiki. Miklu skiptir að tökur á sjó séu í
við sem best vepurskilyrði og ekki í of mikilli sól, því umgjörð myndarinnar
á að vera drungaleg. Gamli Þór, varðskipið okkar fræga, er í veigamiklu
hlutverki og hefur það verið gert heldur ókræsilegt eins og sjá má á ljósmyndinni
frá tökustað í Hvalfirði.
Veðurvaktin er þátttakandi með Landbúnaðarháskóla Íslands í rannsóknakarverkefni sem beinist að þætti úrkomu, jarðavegsraka og þurrktímabila í ofhitnun jarðstrengja. Eini háspennujarðstrengurinn enn sem komið er frá raforkuveri er Nesjavallalína. 15 km hennar frá Mosfellsheiði að Korpu liggur í jörðu. Strengurinn á það til að hitna í þurrkatíð, en jarðvegsraki á þátt í því að flytja varma sem raforkuflutningurinn veldur frá strengnum. Styrkur til verksins upp á kr. 1.600 þús var afhentur við hátíðlega athöfn hjá Orkuveitu Reykjavíkur 4. júní sl. Af hálfu LBHÍ eru það þær Berglind Orradóttir og Elín Björk Jónasdóttir sem taka þátt í rannsókninni, auk Einars Sveinbjörnssonar.
Af hálfu Vegagerðrarinnar og Veðurstofu Íslands sótti Einar Sveinbjörnson ráðstefnu í Prag dagana 14. – 16. maí sl þar sem fjallað var um helstu strauma í veðurþjónustu við vetrarskilyrði. SIRWEC (Standing International Road Weather commission) er samstarf opinberra veðurstofa, og vegagerða nokkurra ríkja þar sem rysjótt vetrarveðrátta hefur áhrif á veghald og umferð. Á tveggja ára fresti bera menn saman bækur sínar í því sem hæst ber í framförum við veghald að vetrarlagi. Mikið er í húfi þar sem kappkostað að auka öryggi á vegum úti og tryggja sem greiðastar samgöngur en jafnframt að halda kostnaði í lágmarki við snjómokstur og hálkuvarnir. Þá veldur mikil notkun salts auknu umhvefisálagi á þéttbýlum landssvæðum t.a.m. í N-Evrópu. Áhugasamir geta nálgast greinargerð um það helsta sem bar á góma í Prag. Greinagerðin
Í blaði byggingatæknifræðinema; Tæknivísir -er grein eftir Einar Sveinbjörnsson um áhrif bygginga á vind:
“Hér á landi þykir meðalvindur á bersvæði yfirleitt frekar hár og alla jafna vindasamt við sjávarsíðuna. Þegar viðfangsefnið er byggingar og þéttbýli er gjarnan fengist við vindinn í hæð gangandi manns (pedestrian wind) eða í 1,75 metra hæð frá yfirborði. Það er sá vindur sem ræður mestu um vellíðan þeirra sem dveljast úti við. Með fyrirhyggju, útsjónarsemi og þekkingu á ríkjandi vindum getur byggðin í heild sinni ásamt þeim trjágróðri sem þar vex brotið upp vind og veitt gott skjól.”
Greinin magnaðir vindstrengir og skjól við byggingar er í heild sinni hér.
Í byrjun apríl stóð Vegagerðin fyrir stórri tveggja daga ráðstefnu um allt sem snýr að
vegum og vetrarþjónustu þeirra. Þar flutti Einar Sveinbjörnsson erindi um snjó og snjóleysi.
Skíðasvæðið í Hlíðarfjalli er komið í fullan rekstur og góður
snjór bæði framleiddur og sá sem kemur af himnum ofan. Veðurvaktin útvegar nú
veðurspár annan veturinn og þær eru sérstaklega sniðnar að Hlíðarfjalli. Spárnar
taka mið að þekkingu og reynslu af veðri á skíðasvæðinu, en þar er jafnan skýlt
í hinum algengu NA- og A-áttum á meðan SV-átt getur orðið slæm í Hlíðarfjalli.
Hitastigið miðast við 500 metra hæð en flestar brekkurnar eru þar ofan við.
Þessar sérspár eru gerðar tvistar í viku, eldsnemma á miðvikudögum og
föstudögum og birtast jafharðan á síðu Hlíðarfjalls.
Veðurvaktin og þjónustudeild Vegagerðarinnar hafa gert með sér samning til reynslu um
sérstkar veðurspár ætlaðar þeim sem starfa að vetrarþjónustu Vegagerðarinnar vítt og breitt um landið.
Einnig hefur verið prófað koma á framfæri sérstökum ábendingum til vegfarenda í samráði við þjónustuver
Vegagerðarinnar á Ísafirði. Veðrið hefur verið einkar stormasamt og erfitt vegasamgöngum frá því á aðventunni
þó óvíða hafi fannfergi verið til trafala. Miklu frekar tíð hálka og hviður við fjöll. Reynslan af þessum
daglegu veðurspám verður metin um miðjan janúar og skoðuð gagnsemi, annars vegar fyrir þá sem sinna vetrarþjónustunni,
þ.e. starfsmenn Vegagerðar og verktaka, ekki síst vegna hálkuvarna. Eins í hvaða mæli og á hvaða formi best er að koma
á framfæri upplýsinum til vegfarenda um t.d. væntanlegan snarpan vind á Kjalarnesi, þoku á Holtuvörðuheiði eða
hríðarbyl á hringveginum yfir Mývatns og Möðrudalsöræfi svo sæmi séu tekin.
Vegagerðin hefur staðið fyrir dagsnámskeiðum nú í nóvember með starfsmönnum sínum í vetrarþjónustunni. Þar er m.a. fjallað um ólíka vetrarveðráttu og hvaða veðuraðstæður skapa hálku. Hálka á vegum getur orðið af 7 til 8 mismunandi orsökum. Þá er einnig farið í áhrif landsins á vind og hvar helst megi gera ráð fyrir snörpum vindhviðum og við hvaða veðuraðstæður. Unnið var með raunveruleg verkefni og spáð og spekúlerað í kort veðurathuganir, og hálkuspár. Veðurvaktin ehf útbjó af þessu tilefni námsheftið Vegir og vetrarveðrátta fyrir Þjónustudeild Vegagerðarinnar. Námskeiðin verða fjögur talsins, í Reykjavík, á Egilsstöðum, Ísafirði og Borðeyri þar sem þessar myndir voru teknar 14. nóvember
Við tökur á tónleikum Sigurrósar vítt og breytt um landið í júlí og ágúst 2006 sá Veðurvaktin um veðurspár í túrnum. Mikið var spáð í vindinn og reynt að haga uppstillingu á sviði og tækjabúnaði til að koma í veg fyrir að möguleg vindgnauð mundi ekki yfirgnæfa eða skemma upptöku tónlistarinnar. Veðurútlitið var yfirleitt með hagstæðasta móti hvar sem spilað var og gekk allt upp. Tónleikarnir í Ásbyrgi voru þannig haldnir að kvöldi eins hlýjasta dags sumarsins á landinu. Þoka var á Seyðisfirði rétt eins vonir stóru til og á stóru tónleikunum á Klambratúni lægði rétt áður en þeir hófust o.s.frv.
Veðurvaktin vann greinargerð fyrir Hanza hópinn um vindskilyrði
í miðbæ Hafnarfjarðar vegna fyrirhugaðs verslunarhúss og íbúða á þeim stað þar
sem Hafnarfjarðarbíó og Kaupfélagshúsið stóðu áður.
Við hönnun þessarar byggingar þarf einkum að huga að þremur vindáttum, þ.e. óveðursáttunum SA og SV
og síðan hafgolu (NV) að sumarlagi. Mikið dregur úr áhrifum þessarar níu hæða byggingar vegna
stöllunar hússins. Sökkull undir hærri byggingu dregur þannig mjög úr vindáhrifum í götuhæð.
